اولا بحييكم جدا على الصفحه الهايله بتاعتكم من زمان وانا متبعاها وبقرا كل المشاكل اللى بتتبعتلكم واقرا حلولها عشان اتعلم منها وعمرى ماكنت اتخيل انى هكتبلكم عن مشكله بعيشها وللحساسيه فبترجاكم عدم ذكر اسمى انا سنى 29 سنه المفروض انى عروسه جديده مجوزه بالظبط من 3 شهور والحمدلله ربنا رزقنى وانا حامل دلوقتى فى 6 اسابيع
معلش استحملونى انا هطول عليكم شويه انا اتقدملى جوزى للجواز من 3 سنين وقبل الخطوبه جاتله الهجره العشوائيه لأمريكا واختار انه يسافر ويحقق طموح حياته وارتباطنا وقف ومكملش بس بعد 9 شهور (وبعد 7 شهور من سفره) رجع كلمنى ع النت واترجانى انه يفتح موضوع ارتباطنا تانى وافقت وفضلنا 14 شهر نتكلم ع النت واتعاملنا مع بعض كأننا مخطوبين وكان اتفاقنا انه هينزل ونتجوز على طول طبعا منكرش ان كان فى مشاكل بينا بس اعتبرتها طبيعيه بين اى اتنين مخطوبين ولأنى مريت بظروف صعبه جدااااااااااااا بعد سفره (موت ابويا وبعدها موت اخويا الصغير بمرضه) فكنت فى اشد الأحتياج للأرتباط دا وحصل فعلا انه جه من السفر واتجوزنا بعد شهرين من وصوله بالظبط بس انا قابلت مشكله فظيعه من اول اسبوع فى جوازنا مقدرتش اكتشفها فى شخصيته لما كنا بنتكلم ع النت وهى "البخل"
كل مشاكلنا حوالين الفلوس ولآنه مجبش شقه واحنا قاعدين فى بيت والدتى وبرغم من اننا بنسحب من خزين البيت الا اننا لو صرفنا اقل مبلغ على الأكل بيتخانق معايا ويعمل مشكله كبيره ويسيبلى البيت ويروح عند والدته بالرغم من انى صرفت من فلوسى الشخصيه الوفات من ساعة جوازى مساعدة ليه وللعلم هو متيسر الحال والحمدلله
انا مش عارفه اعمل ايه لأنى من الشخصيات اللى متعوده اصرف ومش بحرم نفسى ولا بيتى من حاجه انا كل تفكيرى دلوقتى فى البيبى مش فيا
هل هيقدر يصرف على ولادته وعليه ولا لما هيسافر بعد شهر مش هيبعتلى اى مصاريف وساعتها هبقى عبأ على والدتى لدرجة انى بفكر اجهض الحمل وانزل البيبى علشان مظلمهوش معايا وييجى لأب مش هيقدر يتحمل مسئولية تربيته وتعليمه من فضلكم ساعدونى وقولولى اعمل ايه انا عايشه فى جحيييييييييييييييييييم ( شكرا على سعة صدركم )
